ამას წინ ფრანგი დრამატურგი, თეატრის რეჟისორი და მსახიობი – ოლივიე პი წერდა – თეატრი ის შიშველი ინტერიერია, რომელიც ქუჩაში დადისო.
უფრო ზუსტად რომ ვთქვათ, ზოგან დასეირნობს თეატრი და ზოგან – დადის ან – დარბის.
ასეა თუ ისე, ჩვენთანაც „დადის“ და კიდევ ერთ 14 იანვრამდეც – ქართული თეატრის დღემდეც „მოაღწია“; „მოაღწია“ და საქართველოს თეატრალურმა საზოგადოებამ აკაკი ხორავას სახელობის მსახიობის სახლის ახლადრეაბილიტირებულ დარბაზში მოკრძალებულად, მაგრამ მაინც გამოავლინა 2023-2024 წლის თეატრალური სეზონის ყოველწლიური კონკურსის სხვადასხვა ნომინაციაში გამარჯვებულები –
პეტრე ოცხელის სახელობის პრემია ქართული თეატრის წინაშე დამსახურებისთვის საქართველოს სახალხო მხატვარს – მამია მალაზონიას მიენიჭა;
თეატრალური სეზონის საუკეთესო სპექტაკლისთვის „გრან–პრი“ გადაეცა ქუთაისის თეატრის სპექტაკლს – „ჰელვერის ღამე“ (რეჟისორ გიორგი თავაძეს, მსახიობებს: ევა ხუტუნაშვილსა და რამაზ იოსელიანს, სცენოგრაფ ვერა ყიფიანს);
საუკეთესო რეჟისორული ნამუშევრისთვის – გიორგი კაშიას (ზუგდიდის თეატრში დადგმული სპექტაკლისთვის – „სამანიშვილის დედინაცვალი“);
მამაკაცის საუკეთესო როლისთვის – რუსთავის თეატრის მსახიობს – ზვიად დოლიძეს (სპექტაკლ „მარშალში“ მარშლის როლის შესრულებისთვის);
ქალის საუკეთესო როლისთვის პრემია გადაეცა მიხეილ თუმანიშვილის კინომსახიობთა თეატრის მსახიობს – ნინო ბურდულს (სპექტაკლში – „ყოფილების სარეცელი“ ნანას როლის შესრულებისთვის);
მამაკაცის საუკეთესო ეპიზოდური როლის შესრულებისთვის – ნოდარ დუმბაძის სახელობის თბილისის მოზარდ მაყურებელთა თეატრის მსახიობს – გიორგი გოგიშვილს (სპექტაკლში -„ბრმა ძაღლები“ სერაფიონის როლის შესრულებისთვის);
ქალის საუკეთესო ეპიზოდური როლის შესრულებისთვის – ბათუმის თეატრის მსახიობს – მაკა შალიკაშვილს (სპექტაკლში „1902 წელს ბათუმში“ ბოშა ქალის როლის შესრულებისთვის);
ახალგაზრდა მსახიობი ვაჟის როლის საუკეთესოდ შესრულებისთვის – თეატრის მსახიობს – დაჩი ბაბუნაშვილს (სპექტაკლში „ოთარაანთ ქვრივი“ გიორგის როლის შესრულებისთვის);
ახალგაზრდა ქალის როლის საუკეთესოდ შესრულებისთვის – ფოთის თეატრის მსახიობს – ანა ანდღულაძეს (სპექტაკლში – „ჯაყო“ მარგოს როლის შესრულებისთვის);
საუკეთესო სცენოგრაფიული ნამუშევრისთვის – ხატია დავითაშვილს (ზესტაფონის თეატრის სპექტაკლ „ჰამლეტის“ გაფორმებისთვის);
საუკეთესო ორიგინალური მუსიკისთვის – კომპოზიტორ დაჩი დოდაშვილს (გორის თეატრის სპექტაკლ „ოთარაანთ ქვრივის“ გაფორმებისთვის);
საუკეთესო ქორეოგრაფიული ნამუშევრისთვის – ირინე კუპრავას (ფოთის თეატრის სპექტაკლ „ჯაყოს“ გაფორმებისთვის);
საუკეთესო თეორიული ნაშრომისთვის – ხელოვნებათმცოდნეობის დოქტორს – ლაშა ჩხარტიშვილს (მონოგრაფიისთვის – „ერეკლე მეორეს ეპოქის თეატრი“).
